Saturday, October 07, 2006
تليفونات و إيميلات ..... الإخوة و الأخوات
إدينى رنه إبعت رساله
بعدك كوانى و حالتى حاله
هيه الأسيه صبحت عوايدك
ولا المحبه بقت إستحاله
-------------------
على السريع المريع و بدون التعرض إلى الحفل الساهر بالبيت العامر
عند أخونا (أشرف عبد المنعم) ضحية الشهامه و أصحابه المفاجيع و خصوصا (أشرف ضيوف) إبن الحاج فاروق
*
يادى النيله برضه سرحت بره و خشيت على المذبحه اللى حصلت فى عزومة السحور
على كل حال الموضوع ده له حلقه خاصه نعرض فيها بالنقد و التحليل زى إستاد النيل
لكن المره دى كل القصد هو إعلان كيفية الحصول على كل موبايلات و إيميلات الساده الحضور لتسهيل التواصل و إبتدينا فعلا بالناس اللى حضروا السحور المذكور
فلو سمحتوا كل واحد يخش يسيبلنا بياناته و أنا هأعمل ملف فيه كل البيانات و هأبعتها على كل الإيميلات بتاعتكو و هأحدث الملف كل فتره
*
و بالمناسبه جائنا سؤال من الأخ (محمد حسن) عاشق السعوديه و قائد الجناح العسكرى بالكليه كتعليق على الموضوع الأول بالمدونه يسأل فيه عن إمكانية العثور على باقى أعضاء الدفعه الموقرين
أحب أؤكد لسيادتك إن لو كل واحد فينا قابل أى حد و راح مناوله العنوان بتاع المدونه و دعاه إنه يخش عليها و يرميله بقين كلام فالموضوع هاينتشر و هانتقابل و هتبقى الأشيه معدن
*
هاتظل مشكلتين واحده تخص أعضاء الدفعه الغير قادرين على التعامل عبر الإنترنت لظروف الأميه(لا مؤاخذه يا أيمن يا عزام يا نجم الشارقه) و دول واجب إن حد يعطف عليهم و ياخد بإيدهم زى الأفنديات الطلبه فى القرى المصريه أوائل العشرينات من القرن الماضى و دورهم التنويرى فى قراءة الجوابات لأم سعد الدلاله و أبويا إسماعين البقال
*
أما المشكله الثانيه فخاصه برضه بأعضاء الدفعه الغير قادرين على التعامل عبر الإنترنت لظروف سجنهم
ودول إحنا كلنا بندعيلهم إن ربنا يفك سجنهم و نبشرهم إن السجن للجدعان و أيضا نشكرهم جزيل الشكر إنهم طلعوا رجاله و ماجابوش سيرتنا
محمد منيسى
Tuesday, October 03, 2006
إنتوا فين يا جدعان
صحيح فات عشرين سنه
و ليه مش حاسس بده أنا
أيام و فاتت و لا عديت
ما حسبت شقا و لا هنا
-------------------
يا لهوىىىىىىىى
إزاى ده حصل يا جدعان؟ شئ لا يصد(ك)ه ع(ك)ل على رأى شويكار
*
حد يصدق إن كل السنين دى عدت و إن إحنا إنتقلنا من
مرحلة (قشطه) البائده إلى مرحلة (طحن) المعاصره
*
و من بنطلونات الجينز الإستريتش (مساك الله بالخير يا حازم يا صلاح) إلى البنطلونات اللى حجرها عند الركب
*
دى الدنيا تلاهى و العمر لحظه فعلا
و إبن أدم ريشه فى هوا أو قشة فى بحر
*
و ربنا كريم بيرزق الهاجع و الناجع و النايم على صرصور ودنه
و اللى مش مصدقنى يسأل فلافيو
و اللى مكدبنى يسأل محمد عبد المنصف الشهير بأوسه
*
طب بلاش كل ده خد عندك
*
حد يصدق إن الواد (عمرو النجار) بقى من خبراء التقييم و التحليل (لا مؤاخذه) المالى فى مصر
ماهو علشان كده أكيد أبو جنيه بيتباع بعشره و أبو ميه بيتباع ببريزه وحمار اللى فاهم حاجه فى البلد (الحبيبه) دى
*
ولا الواد سوكونونو (عطيه) اللى إختار مستقبله بلعبة ملك و كتابه (أه و النعمه مش هزار) بقى ممشى مكتب مصر للطيران فى جده
الست سعاد جارتنا أبوها راح العمره السنة اللى فاتت على مصر للطيران و عطيه ظبطه تظبيط شديد
الله يرحمه غرق و هو راجع فى العبارة السلام
*
سيبك من كل ده
يا مؤمن بلد إيه دى اللى (أشرف فاروق سيد على عمر سيدى أحمد الإسود) يبقى مقاول فيها
و صاحب مكتب إستشارات هندسيه (نقاش) يعنى
و مستغربين العماير اللى بتقع على دماغ صحابها
طب كله كوم و عمارة الدقى اللى نسى يعملها سلالم دى لوحدها كوم
*
و النماذج المشرفه أكتر من الهم على القلب
بس ضيق المساحه مش مساعد و كمان ربنا أمر بالستر
*
يا جدعان حرام و الله
الناس دى كان لازم ماتخرجش من الكليه حفاظا على المجتمع
أو على الأقل كان كل واحد يمضوه تعهد إنه يقضيها قعاد فى البيت أو على القهوه
*
قصره اللى حصل حصل
المهم أنا قلت نستفيد من التكنولوجيا و نحاول نتقابل على النت
أهو نعرف أخبار بعض و نتواصل على رأى بتوع البيت بيتك
و على رأى اللى قال من شاف بلوة غيره هانت عليه بلوته
*
يا خريجى 1990 إنتوا فين يا جدعان
ياريت تشرفوا على المدونه (إسمها كده بالعربى) و تقترحوا مواضيع نتكلم فيها و نتجمع تانى
حتى عبر الشبكه العنكبوتيه و ده أقل واجب
*
*
محمد منيسى
