Sunday, November 05, 2006
أيام النجار...... الجزء التانى
عمرو النجار خلف عيل و العقل إحتار
على بك باشا وأومباشى و سيد التجار
ما ورثشى شكله و لا مشاكله ماعليهش غبار
أما الطبايع واد صايع لعيب بالنار
-------------------
مش عارف ليه أول ما عمروالنجار بعتلى البشارة إفتكرت نكتة الأستاذ أحمداللى كان قاعد فى الفور كورنرز و لقى إتنين (واحد كهل و التانى شاب) سكرانين طينه و لسه بيشربوا و الكهل عزم على الشاب
ك- خد كاس
ش- هات كاس
ك- إنت ساكن فين
ش- فى مصر الجديده
ك- و الله قشطه أنا كمان فى مصر الجديده
ش- خد كاس
ك- هات كاس
ش- فين فى مصر الجديده
ك- فى الحجاز
ش- يا راجل أنا كمان فى الحجاز
ك- خد كاس
ش- هات كاس
ك- عمارة كام فى الحجاز
ش- عمارة إتنين و تلاتين
ك- مش ممكن أنا كمان فى نفس العمارة
ش- خد كاس
ك- هات كاس
ش- شقه كام بقى يا زعيم
ك- شقه إتناشر
ش- لا لا لا إنت هاتسكر عليا ولا إيه. أنا اللى فى شقه إتناشر
ك- و حياة أمك. باين عليك جديد فى الشرب. أنا اللى فى شقة إتناشر
*
المهم مسكوا فى بعض سيحوا دم بعض و إتهدوا كل واحد فى ناحيه
*
أخونا أحمد (بتاع أول النكته) سأل البارمان إيه الحكايه؟
*
البارمان - أبدا يا أستاذ يكفينا الشر ده واحد و أبوه كل يوم يييجوا يسكروا هنا و يتخانقوا
*
ألف مبروك يا نجار و ربنا يسامحك على الجريمه اللى إنت إرتكبتها فى حق البشريه
و أملنا فى ربنا إنه ما يلقطش منك حاجه غير شعرك اللى لا وقع و لا إبيض (جتنا نيله فى حظنا الهباب) اللهم لا حسد
*
يا سلام يا جدعان فعلا أيام العمر (معضوضه) وكله بيعدى
*
أنا بالمناسبه العظيمه دى بأفتح باب التوقعات للمستقبل المشرق بإذن الله للأستاذ على النجار و بأدعوكم لإرسال رأيكم فى مهنة المستقبل له
*
أنا رأيى إنه هايعدى أبوه بمراحل و هيبقى وزير كمان 25 سنه
ممكن يقلوا أو يزيدوا شويه على حسب إمتى مصر تقتدى بهولندا و تبيح بيع الحشيش و كمان تخلى فيه وزير مخصوص له و يطلق عليه
وزير التموين المخصوص أوزير المزاج العالى (زى التعليم العالى) أو ما شابه ذلك
*
فى إنتظار أرائكم الكريمه
*
أما بخصوص الأستاذ على باشا طموم فأنا بأنصح أبوه إنه يسفره بره مصر فى مدرسه داخليه حماية لأخلاقه العاليه و صفاته النبيله وخصوصا إن إسمه فى كشف الفصل هايخليه قريب قوى من عيال بايظين بالسليقه
*
ملحوظه هامه
*
يا طموم لو هاتسفر الواد إبعد عن الكويت لأنها خلاص إضربت
*
*
محمد منيسى
